«Арсенал» бош мураббийи Микель Артета жамоа ярим ҳимоячиси Мартин Субимендининг эҳтимолий трансфери ҳақида тарқалаётган хабарларга муносабат билдирди.

«Канонирлар» «Ньюкасл»дан Бруно Гимараэсни ўз сафига қўшиб олганидан сўнг Субимендининг жамоани тарк этиши мумкинлиги ҳақидаги гап-сўзлар авж олди. Бироқ Артета испаниялик ярим ҳимоячи клуб учун муҳим футболчи эканини таъкидлаб, уни сотиш режаси йўқлигини маълум қилди.

«Йўқ, у биз учун ҳақиқатан ҳам жуда муҳим футболчи. Ҳеч шубҳасиз, Мартин ўтган мавсумда «Арсенал»нинг энг яхши ўйинчиларидан бири бўлди. Усиз сўнгги вақтларда эришган натижаларимизга эриша олмаган бўлардик», — деди Артета. Унинг сўзларини инсайдер Фабрицио Романо келтирди.

«Арсенал» Субимендини ўтган йил ёзида «Реал Сосьедад»дан 70 миллион евро эвазига сотиб олган.

27 ёшли испаниялик ярим ҳимоячининг Лондон клуби билан амалдаги шартномаси 2030 йилга қадар мўлжалланган.