«Манчестер Сити» «Палмейрас»нинг 22 ёшли вингери Алан Андраде трансферига жиддий қизиқиш билдирмоқда ва футболчи учун 35 миллион евро тўлашга тайёр. Англия клуби ҳозирча расмий таклиф киритмаган бўлса-да, бразилиялик футболчини харид қилиш бўйича дастлабки мулоқотларни бошлаган.

«Палмейрас» томони эса футболчини осонликча қўйиб юбормоқчи эмас — бразилияликлар турли гол ва натижалар учун бонус тўловларини ҳисобга олган ҳолда камида 38 миллион евро олмоқчи. «Сити» раҳбарияти ушбу вингерни «Тоттенхэм»га ўтиши кутилаётган Савиньонинг ўрнини тўлдирувчи асосий номзодлардан бири сифатида кўрмоқда.

Жорий мавсумда Алан Андраде Бразилия А Сериясида «Палмейрас» сафида 20 та ўйинда майдонга тушиб, 4 та гол урди ва 2 та голли узатмага муаллифлик қилди.