«Тоттенхэм»нинг янги футболчиси Савиньо Лондон клуби билан шартнома имзолаганидан сўнг ўз фикрлари билан ўртоқлашди. 25 август куни «шпорлар» матбуот хизмати 22 ёшли бразилиялик футболчи «Манчестер Сити»дан трансфер қилинганини расман эълон қилган эди.

«Мен бу ерда эканимдан ва шундай буюк клубда, дунёнинг энг яхши мураббийларидан бири қўл остида ўйнаш имкониятига эга бўлганимдан жуда хурсандман. Мураббий билан гаплашишим билан бу ерга келишим кераклигини тушундим. У менга энг юқори чўққиларга эришишга ёрдам беришини айтди. Ишончим комилки, буни уддалай оламиз», — деди Савиньо клуб матбуот хизматига.

Эслатиб ўтамиз, «Тоттенхэм»нинг навбатдаги ўйини эртага, 26 август куни бўлиб ўтади. Ушбу кунда «шпорлар» Англия лига кубогининг иккинчи босқичи доирасида «Чарльтон»ни қабул қилади. Учрашув Тошкент вақти билан соат 23:45 да бошланиши режалаштирилган.