"Ливерпуль"нинг собиқ ҳимоячиси, ҳозирда футбол эксперти сифатида фаолият юритаётган Жейми Каррагер Хаби Алонсонинг "Реал" бош мураббийи лавозимидан кетиши Винисиус Жуниор билан боғлиқ вазият туфайли содир бўлганини билдирди.
"Очиғини айтганда, Алонсо Винисиус билан боғлиқ вазият сабаб ишидан айрилди. Мураббий содир бўлаётган ҳолатдан норози эди. Раҳбарият билан суҳбатдан кейин клуб футболчи томонини танлади. Натижада Хаби истеъфога чиқарилди ва унинг ўрнини Арбелоа эгаллади", — дея Каррагернинг сўзларини Sky Sports келтирди.
Айни пайтда Хаби Алонсо "Челси"ни бошқармоқда. У июль ойида Лондон клуби бош мураббийи лавозимини эгаллади.
44 ёшли испаниялик мутахассис "кўклар" билан узоқ муддатли шартнома имзолаган бўлиб, битим 2030 йил июнь ойи охирига қадар амал қилади.
Июнь ойида "Реал" Альваро Арбелоа билан шартнома бекор қилинганини эълон қилди. 8 июлдан бошлаб у Англиянинг "Фулхэм" клубини бошқармоқда.
Арбелоанинг "Фулхэм" билан шартномаси 2029 йил ёзига қадар мўлжалланган.
