«Челси»нинг собиқ ҳимоячиси Роберт Хут «Ливерпуль» ярим ҳимоячиси Флориан Вирцнинг жамоадаги келажаги ҳақида фикр билдирди. У немис футболчиси қишки трансферлар ойнасида клубни тарк этиши мумкинлигини тахмин қилди. 

"Вазият қандай ўзгариши мумкинлигини тасаввур қилиш мен учун жуда қийин. Албатта, у яхши футболчи, аммо жисмоний тайёргарлиги билан боғлиқ муаммолари бор. Унинг майдондаги хатти-ҳаракатлари ҳам унчалик яхши таассурот қолдирмаяпти.

Агар у ўз ўйинини яхшиламаса, эҳтимол, Рождество байрамига келиб, «Ливерпуль» уни сотиш имкониятларини излай бошлайди.

Чунки у клуб учун қимматга тушган муаммога айланиб қолди", — деди Хут «In The Mixer» подкастида. 

Вирц 2025 йил ёзида «Байер»дан «Ливерпуль»га ўтган ва трансфер қиймати бонуслар билан бирга 136 миллион еврога етган эди.