«Ювентус» ҳужумчиси Жонатан Дэвид фаолиятини «Атлетико»да давом эттиради.

Таниқли инсайдер Фабрицио Романонинг хабар беришича, Мадрид клуби 26 ёшли канадалик футболчининг трансфери бўйича туринликлар билан келишувга эришган.

Дэвид «Атлетико» сафига ижара асосида ўтади. Келишувда футболчини кейинчалик тўлиқ сотиб олиш ҳуқуқи ҳам кўзда тутилган. Шунингдек, Испания клуби ҳужумчининг маошининг ярмидан кўпроқ қисмини ўз зиммасига олади.

Канадалик футболчи 2025 йил ёзидан буён «Ювентус» шарафини ҳимоя қилиб келмоқда. У «Лилль» билан шартномаси якунланганидан сўнг Турин клубига эркин агент сифатида қўшилган ва 2030 йил июнига қадар мўлжалланган шартнома имзолаган.

Дэвид «Ювентус» сафида жами 47 та учрашувда майдонга тушиб, 8 та гол урди ва 5 та голли узатмани амалга оширди.