«Арсенал» вингери Букайо Сака Англия Премьер-лигасининг 2-турида «Астон Вилла» устидан қозонилган ғалаба ҳақида фикр билдирди.

Сафарда ўтган учрашув лондонликларнинг 1:0 ҳисобидаги ғалабаси билан якунланди. Баҳсдаги ягона голни 59-дақиқада Саканинг ўзи урди.

«Жуда-жуда қийин ўйин бўлди. Бу ерда ҳеч қачон осон бўлмайди. Рақиб бизга анча муаммо туғдирди. Шунинг учун бу ғалаба янада кўпроқ қувонч бағишлайди», — деди Сака.

Англиялик футболчи «Астон Вилла»нинг ҳимоядаги ҳаракатларига ҳам тўхталди.

«Улар жуда зич ҳимояланди ва ҳимоя чизиғини баланд кўтариб ўйнади. Шу сабабли биз кўп бор офсайд ҳолатига тушиб қолдик. Биз бунга мослашишимизга тўғри келди.

Бу ўтган ҳафтадаги ўйинимиздан жуда фарқ қилди. Одатдаги ҳужум комбинацияларимизни амалга ошириш бизга осон бўлмади», — деди у.

Сака жамоасининг тўпсиз ҳаракатини алоҳида эътироф этди.

«Тўп билан энг юқори савиямизда ўйнай олмадик. Аммо тўпсиз жуда ажойиб ҳаракат қилдик. Тўпни йўқотишимиз билан дарҳол орқага қайтдик.

Биз уларнинг ҳимоядан ҳужумга жуда тез ўтишини билардик. Бугун барча йигитлар бор кучини берди. Айнан шу нарса дарвозамиз дахлсизлигини сақлашимизга ёрдам берди», — деди футболчи.

«Манчестер Сити», «Арсенал», «Халл Сити» ва «Челси» 6 очкодан жамғариб, турнир жадвали пешқадамлари сафида бормоқда.

Кейинги турда «Арсенал» ва «Челси» ўзаро баҳс олиб боради.