«Милан»нинг янги футболчиси Гонсалу Рамуш унинг трансфери ва маоши учун катта маблағ сарфланганини клуб томонидан билдирилган ишонч сифатида қабул қилишини айтди. Шу сабабли у бу мавзудаги саволларни унчалик хуш кўрмаслигини таъкидлади.
«Менга қанча пул тўлангани ҳақида эмас, клубнинг менга бўлган ишончи ҳақида ўйлайман. Менга юқори маош таклиф қилинганининг ўзи яхши белги — бу менга ишонишларини англатади.
Энди мен ўзимни исботлашим керак. Бу эса мен учун қўшимча мотивация бўлиб хизмат қилади», — деди Рамуш.
Эслатиб ўтамиз, португалиялик футболчининг аввалги клуби Франциянинг «ПСЖ» жамоаси эди. Парижликлар Чемпионлар лигасининг амалдаги ғолиби ҳисобланади.
