Ярим ўрта вазн тоифасида UFC’нинг собиқ чемпиони, келиб чиқиши фаластинлик бўлган америкалик Белал Муҳаммад франциялик дебютант Салахдин Парнасснинг Париждаги UFC Fight Night 287 турнирининг марказий жангида Дэн Хукер устидан қозонган ғалабасига муносабат билдириб, янги аъзонинг навбатдаги рақиби промоушен ветерани Майкл Чендлер бўлишини тахмин қилди.
«Айтганимдек бўлди. Бас, энди унга навбатдаги рақиб сифатида Майкл Чендлерни беришади, гарчи Парнасс Салкиллдга қарши жанги даҳшат бўлар эди», — деб ёзди Муҳаммад X ижтимоий тармоғидаги ўз саҳифасида.
Салахдин Парнасс 28 ёшда. Франциялик спортчи аралаш яккакурашлар бўйича профессионал жангчи сифатида 2014 йилда дебют қилган, 2017 йилдан бери Польшанинг KSW ташкилотида мусобақалашиб, икки вазн тоифасида чемпион бўлган. Унинг ҳисобида жами 26 та ғалаба ва иккита мағлубият бор.
