«Барселона» бош мураббийи Ханс-Дитер Флик Фермин Лопес ва Дани Ольмо ўртасида танлов қилиш қанчалик қийин экани ҳақида фикр билдирди.

Якшанба куни Ла Лиганинг «Валенсия»га қарши ва 5:0 ҳисобида якунланган учрашувида Фермин асосий таркибда майдонга тушиб, 1 та гол ва 2 та голли узатма қайд этди. Уни 75-дақиқада алмаштирган Дани Ольмо ҳам икки марта шерикларига голли пас берди.

«Бизда асосий таркибда ўйнашга қодир футболчилар жуда кўп. Менинг вазифам — ўйин вақтини тўғри тақсимлаш ва барчанинг мамнун бўлишини таъминлаш.

Ольмонинг ўйини менга жуда ёқади ва у кўпроқ майдонга тушишни хоҳлаётганини биламан. Мен жамоа манфаати учун энг тўғри қарорларни қабул қилишга ҳаракат қиламан», — дея Фликнинг сўзларини Barca Universal келтирди.

«Барселона» 4 турдан сўнг 12 очко жамғариб, турнир жадвалида пешқадамлик қилмоқда.