Аргентина терма жамоасининг собиқ футболчиси Серхио Агуэро Лионель Мессининг миллий жамоадаги фаолиятини якунлаши унинг клуб миқёсидаги карьерасини узайтиришга ёрдам бериши мумкинлиги ҳақида фикр билдирди.

«Буни ҳеч қачон аниқ билиб бўлмайди, аммо ҳозир у жуда хотиржам кўринади ва футболдан завқ оляпти. У кўп йиллар давомида терма жамоа учун бор кучини берди ва энг муҳим мақсадга — жаҳон чемпионлигига эришди.

Терма жамоадаги фаолиятини якунлаши унга тикланиш учун кўпроқ вақт беради. Балки шу орқали у иложи борича узоқроқ футбол ўйнай олар. Аммо қачон тўхташ кераклигини ўзи ҳис қилган пайтда қарор қабул қилади.

Биз, аргентиналиклар, у билан фахрланамиз ва қилган барча ишлари учун ундан миннатдормиз», — дея Агуэронинг сўзларини Stake Football келтирди.

Аввалроқ Лионель Месси Аргентина терма жамоасидаги фаолиятини якунлашини маълум қилган эди. У октябрь ойида миллий жамоа сафида хайрлашув учрашувини ўтказади.