"Барселона" ва "Реал"нинг собиқ футболчиси Луиш Фигу Sport нашри ўтказган қисқа сўровномада ўзига атмосфераси билан энг катта таассурот қолдирган стадионлар ҳақида гапирди.
Ундан дунёда қайси арена энг катта таассурот қолдиргани сўралганда, португалиялик футболчи "Ливерпуль" стадионини тилга олди.
Кейин Фигудан Испаниядаги энг кучли атмосферага эга стадионни айтиш сўралди. У "Барселона" ва "Реал" ареналарини истисно қилган ҳолда:
"Эҳтимол, "Сан-Мамес", дея жавоб берди.
Шунингдек, Фигудан фаолиятидаги энг яхши голини танлаш сўралди.
"Бу осон, чунки мен унчалик кўп гол урмаганман. Европа чемпионатида Англияга қарши ўйинда урган голимни танлайман", деди у.
Луиш Фигу 2009 йилда "Интер" футболчиси сифатида фаолиятини якунлаган. У фаолияти давомида "Спортинг", "Барселона" ва Мадриднинг "Реал" клублари шарафини ҳам ҳимоя қилган.
