«Челси» «Сантос» ярим ҳимоячиси Габриэл Бонтемпони кузатишда давом этмоқда.

Bolavip маълумотига кўра, Лондон клуби скаутлари 21 ёшли футболчининг ўйинини мунтазам кузатиб бормоқда. Бонтемпо сўнгги вақтлардаги муваффақиятли ўйинлари ортидан илк бор Бразилия миллий жамоасига ҳам чақирув олди.

У Кука бошчилигида «Сантос»нинг асосий таркибидан мустаҳкам жой эгаллаган. Жорий мавсумда Бонтемпо 44 та ўйинда майдонга тушиб, 5 та гол урди ва 4 та голли узатмани амалга оширди.

Аввалроқ «Сантос» молиявий қийинчиликлар сабаб футболчи учун тахминан 12 миллион евро атрофидаги таклифларни муҳокама қилишга тайёр экани айтилган эди. Бироқ ҳозир клуб Бонтемпони сақлаб қолишни истамоқда ва фақат жуда манфаатли таклиф келган тақдирдагина уни сотиш масаласини кўриб чиқади.

«Челси»ни футболчининг универсаллиги ҳам қизиқтирмоқда. Бонтемпо ҳужумкор ярим ҳимоячи, олдинроқ позициядаги «саккизлик» ёки қанотдан марказга силжиб ҳаракат қилувчи футболчи сифатида ўйнай олади.

Унинг чизиқлар орасида тўп қабул қилиши ва тор ҳудудларда ҳужумни ривожлантириш қобилияти алоҳида эътиборга тушган.

Шу билан бирга, 21 ёшли футболчининг ўйинида ҳали ривожлантирилиши керак бўлган жиҳатлар ҳам бор. Хусусан, узоқ масофадан зарба бериш ва жарима майдони ичига кўпроқ очилиб кириш борасида ундан ўсиш кутилмоқда.