Италия чемпионати доирасидаги «Торино» ҳамда «Ювентус» жамоалари ўртасидаги Турин дербиси бу гал ҳам муаммосиз ўтмади. «Торино»нинг расмий сайтида «Ювентус» мураббийи Антонио Контенинг сўзларига нисбатан кескин фикрлар эълон қилинди. Бундан ташқари улар ўйинда ягоналигини сақлаб қолган Карлос Тевеснинг голи ўйиндан ташқари ҳолатдан киритилгани маълум қилишган.

Ўйиндан кейин Конте Тевеснинг голи бўйича берилган саволларга қуйидагича жавоб берган эди: «Биз ўйиннинг 70 фоизида тўп билан муомала қилдик ва жуда кўп ҳужум уюштирдик. Биз ғалабага муносиб эдик. Бизнинг ғалабамиздан кейин норозиликлар бўлиши табиий ҳол. Лекин А сериянинг расмий сайтида «Ювентус» 52 фоиз вақт давомида тўп билан муомала қилгани ёзилган. Катта фарқ».

«Иммобили Тевес билан бўлган вазиятда қизил карточкага муносиб эди. Агар «Торино» ўн киши бўлиб қолса, нима қиларди? Погба ва Маркизио қизил карточкага муносиб эдими деган саволни беришим мумкин»,- дейди мураббий.

«Ҳақиқат шуки, «Ювентус» офсайддан киритилган гол эвазига ғалаба қозонди. Қолган гаплар бефойда. Конте мактабда математикадан кўра итальян тилини яхшироқ ўқиган кўринади»,- деб ёзилади клуб расмий сайтида.