«Эспаньол» спорт директори Мончи «Барселона» вингери Ламин Ямални «Олтин тўп» учун қўллаб-қувватлагани сабаб клуб мухлисларидан узр сўради.
Мончи аввалроқ нуфузли шахсий соврин учун Килиан Мбаппе ва Харри Кейндан кўра Ямални танлашини айтган эди. Бу фикр «Барселона» «Эспаньол»нинг асосий рақиби бўлгани сабаб клуб мухлислари орасида норозилик келтириб чиқарди.
«Мендан Мбаппе, Кейн ва Ламин Ямал ўртасида танлов қилишимни сўрашди. Мен испан футболчиси номзодини танладим. Бу мухлисларимиз орасида маълум баҳсларга сабаб бўлди. Агар кимнидир хафа қилган бўлсам, узр сўрайман», — деди Мончи Cadena SER эфирида.
«Мен Испаниядан бўлган номзодни қўллаб-қувватладим. Аммо «Эспаньол» мухлиси сифатида бошқа исталган футболчининг номини айтишим керак эди. «Эспаньол» мухлиси бўлиш нимани англатишини биламан — бу ҳисни биринчи кунданоқ сезганман. Ламин Ямални Испания нуқтаи назаридан келиб чиқиб танлаган эдим», — дея қўшимча қилди у.
