Ўзбекистонда 2027 йилги U-20 Жаҳон чемпионатига тайёргарлик масалалари ФИФА раҳбарияти билан юқори даражада муҳокама қилинди.
Президент Шавкат Мирзиёев 30 сентябрь куни Тошкентда ФИФА президенти Жанни Инфантинони қабул қилди. Учрашувда Ўзбекистон ва Озарбайжон мезбонлик қиладиган 20 ёшгача бўлган футболчилар ўртасидаги Жаҳон чемпионатини юқори савияда ташкил этиш асосий мавзулардан бири бўлди.
Томонлар ФИФА билан ҳамкорликни янги босқичга олиб чиқиш, мамлакатда футболни оммалаштириш ва ёш иқтидорларни аниқлаш тизимини янада ривожлантириш масалалари юзасидан фикр алмашди.
Шунингдек, мураббийлар, ҳакамлар, футбол менежерлари, спорт тиббиёти ходимлари ва техник мутахассисларни халқаро стандартлар асосида тайёрлаш бўйича қўшма лойиҳаларни кенгайтириш масаласи кўриб чиқилди.
Алоҳида эътибор Ўзбекистонда ФИФАнинг йирик турнир ва тадбирларини кўпроқ ташкил этиш ҳамда Тошкентда ташкилотнинг Марказий Осиё бўйича минтақавий ваколатхонасини очиш жараёнига қаратилди. Бундай офисни Тошкентда ташкил этиш масаласи Мирзиёев ва Инфантинонинг 2025 йилги учрашувида ҳам муҳокама қилинган эди.
ФИФА аввалроқ 2027 йилги U-20 Жаҳон чемпионати Ўзбекистон ва Озарбайжонда ўтказилишини тасдиқлаган. Ўзбекистонда мусобақага тайёргарлик бўйича алоҳида давлат дастури ҳам қабул қилинган.
