«Барселона»нинг бразилиялик қанот ҳужумчиси Рафинья жароҳатидан тикланиш жараёнида майдондаги машғулотларга қайтди. Бу ҳақда SER Catalunya хабар бермоқда.

Футболчи ўнг сонида кичик шиш пайдо бўлгани сабабли терма жамоа ихтиёридан муддатидан аввал қайтган эди. Шундан сўнг у индивидуал дастур асосида машғулотлар олиб борди.

Рафинья аввал ҳам сонининг айнан шу қисмида жароҳат билан боғлиқ муаммоларга дуч келгани сабабли «Барселона» тиббий штаби унинг тикланиш жараёнига эҳтиёткорлик билан ёндашмоқда.

Бироқ бразилиялик ҳужумчи майдондаги машғулотларга қайтганига қарамай, сешанба куни УЕФА Чемпионлар лигаси доирасида «Галатасарой»га қарши ўтказиладиган учрашувда иштирок этмайди.

SER Catalunya маълумотига кўра, Рафинья жамоа билан Туркияга сафар қилмайди.

Футболчининг майдондаги машғулотларни қайта бошлагани тикланиш жараёнида ижобий силжиш борлигини кўрсатмоқда. Шунга қарамай, у ҳозирча тўлиқ жисмоний тайёргарлигини тиклашга эътибор қаратган.