Твиттер фойдаланувчиси @gazprom_mafia 16 декабрь куни бўлиб ўтган Европа Чемпионлар лигаси нимчорак финал қуръасини олдиндан аниқ тахмин қилди.

Қуръадан уч кун аввал фойдаланувчи саккиз жуфтликни алоҳида твитлар билан ёзиб чиққан. Ўзини «Россиялик футбол мухлиси» дея таърифлаган фойдаланувчи ўз тахминларини ёзишдан аввал, қуръа натижаларини унга «Газпром» компаниясида ишловчи одам унга олдиндан жўнатганини маълум қилган. Фойдаланувчининг сўзларига кўра, ушбу фош этиш ишлари унга «футболни тозароқ қилиш» учун керак бўлган.

Твитлар муаллифнинг қайд этишича, Россиянинг «Газпром» компанияси Европа Чемпионлар лигаси нимчорак финалига чиққан учта жамоа – Россиянинг «Зенит», Германиянинг «Шальке-04» ва Англиянинг «Челси» жамоаларига ҳомийлик қилади ва, ўз нуфузидан фойдалангани ҳолда, улар учун энг яхши шароитларни ҳозирлашга ҳаракат қилмоқда.