Англиянинг Гастингс шаҳрида ўтказилаётган "Hastings Masters" шахмат фестивали тобора ҳал қилувчи паллага кириб бормоқда.

Дунёнинг 23 давлатидан келган 95 нафар шахматчи иштирокида ўтказилаётган бу йилги мусобақада Ватанимиз шарафини халқаро мастер Жаҳонгир Воҳидов ҳимоя қилмоқда.

Швейцарча тизимда 9 турдан иборат бўлган мазкур мусобақада Жаҳонгир бугунги кунга қадар ўтказилган ўйинлар якунларига кўра 5 имкониятдан уч очко жамғариб, совринли ўринлар учун курашни давом эттирмоқда.

Жаҳонгир дастлабки икки турда сербиялик Жовика Радованивич ва германиялик Мартин Шустерни мағлуб этиб, учинчи турда хитойлик Кун Ма билан дуранг ўйнади. Тўртинчи турда ҳамюртимизга турнир пешқадами Михаил Мчедлишвили (Грузия) рўбаро келди ва муросасиз кечган партияда грузиялик спортчи ғалаба қозонди.Бешинчи турда британиялик шахматчига қарши баҳс юритган Жаҳонгир яна дурангга имзо чекди.

Бугун ўтказиладиган 6-турда ҳамюртимиз украиналик Петр Марусенкога қарши дона суради.

Мусобақада 5 имкониятдан 4,5 очко жамғарган Михаил Мчедлишвили пешқадамлик қилмоқда. Турнир ғолиб ва совриндорлари 5-январь куни маълум бўлади.