"Рома" ҳужумчиси Маттиа Дестро Лондоннинг "Арсенал" клуби эътиборига тушди. Panorama хабарига кўра, "тўпчилар" раҳбарияти аллақачон 22 ёшли италияликнинг агенти билан алоқага чиқишга ҳам улгурганлар.
Агент Клаудио Вигорелли "Арсенал"га бегона эмас. Ўтган йили "Палермо" дарвозабони Эмилиано Вивианонинг ижара асосида Лондонга келишида ушбу агентнинг ҳиссаси бўлганди. Манба маълумотига кўра, Венгер Дестрони мавсум якунида ўз жамоасида кўришни истамоқда.
Қайд этилишича, "Рома" уни қўйиб юборишга қарши эмас, сабаби ёзда римликлар таркиби Антонио Санабрия, Леандро Паредес ва Хуан Итурбелар билан бойиши кутилмоқда.
Мавсумда миллий чемпионат доирасида ҳозирча 4 ўйин ўтказган Дестро 3та гол ва 1та голли паснинг муаллифи бўлиб турибди.