"МЮ" ҳужумчиси Уэйн Руни учун курашга, The Telegraph тарқатаётган хабарга кўра, Мадриднинг "Реал" клуби ҳам қўшилди. Хабарингиз бор, ушбу футболчига "Челси" ҳам даъвогар.
Бир ярим йилдан кейин эркин агент мақомини олиши мумкин бўлган Англия терма жамоасининг 28 ёшли ўйинчиси учун испанлар мавсум якунида 25 миллион фунт тўлашга тайёрлар.
Манбанинг ёзишича, "Реал" раҳбарияти ушбу трансферни Серхио Агуэро ("Манчестер Сити"), Луис Суарес ("Ливерпуль") ва Радамель Фалькао ("Монако") кабиларнинг харидига қараганда амалга ошиш имконияти кўпроқ деб ҳисобламоқда. Хабарингиз бор, юқоридаги ўйинчилар ўз клублари билан узоқ муддатли шартномаларга эгалар.
Қайд этилишича, Рунининг ўзи ҳам "Реал"га ўтишга қарши бўлмайди. Бунга унинг собиқ жамоадоши Криштиану Роналдунинг Мадридда экани ҳам таъсир қилиши таъкидланмоқда.
Эслатиб ўтамиз, АПЛнинг 17 ўйинида майдонга тушган Руни ҳисобида 9та гол ва 11та голли пас бор.