Кеча ЎФФда терма жамоаларнинг янги иш режасини тузиш юзасидан мажлис ўтказилди. Унда Мираброр Усмонов терма жамоаларга футболчи жалб қилишда "маҳаллийчилик, таниш-билишчилик ва уруғ-аймоқчилик ҳолатларига йўқ қўйилмаслиги" ҳақида тўхталгач, ЎФФ ижроқўми аъзолари бу масалани бир овоздан қўллаб-қувватлади ва Қарор қабул қилди.

Унга кўра, бу каби иллатларни олдини олиш ва назорат қилиш учун 1 февралга қадар бир неча мутахассислардан иборат гуруҳ тузилади ва Ўзбекистон миллий терма жамоаларига номзод футболчиларни жалб қилишнинг янги тартиби ишлаб чиқилади. Шунингдек, ЎФФ ижроқўми йиғилишида кун тартибидан ўрин олган яна бир нечта масалалар юзасидан Қарорлар қабул қилинди.

Улар орасида ФИФА ва ОФК регламентига тўла жавоб бера оладиган, замонавий ва ҳашаматли футзал саройини қуриш бўйича ҳам қарор чиқарилган.

Шунингдек, болалар-ўсмирлар футболини ривожлантириш мақсадида Ўзбекистон Футбол Федерациясида янги бошқарма ҳам ташкил этилади.

Мажлис якунида, 1 февралгача бўлган муддат ичида юқоридаги барча структуралар ЎФФ Котибиятига иш режаларини топширишлари белгилаб қўйилди.