Эртага Тошкентнинг «Бунёдкор» клуби Осиё чемпионлар лигаси доирасидаги навбатдаги учрашувини ўтказади. Миржалол Қосимов шогирдлари гуруҳ босқичининг 3-туридан Эроннинг «Фулад» клубига қарши ўйинда майдонга тушишади. Шу муносабат билан пойтахтимиздаги «Пахтакор» стадионининг конференц-залида ОАВ учун матбот анжумани бўлиб ўтди. Матбот анжуманининг биринчи қисмида «Фулад» бош мураббийи савлларга жавоб берди.

— Ўзбекистонда бўлиб турганимиздан ҳурсандман. Яхши кайфиятдамиз. Аввалги икки турда 4 очко жамғардик. Бу яхши натижа. "Бунёдкор" ўз уйида жуда кучли ўйин кўрсатади. Ўзбекистон футболи Осиёда ўз ўрнига эга. Буни барчамиз яхши биламиз. Тошкентга яхши кайфиятда ва ғалаба учун келдик. Эртага бизни жуда қийин ўйин кутиб турибди. Биз ўйинга тайёрмиз. "Бунёдкор" сафида тажрибали футболчилар билан бир қаторда жуда кўп иқтидорли ёш футболчилар бор. Улардан эҳтиёт бўлиш лозим. Ўйлашимча, эртага "Бунёдкор" мураббийи кўпроқ тажрибали футболчиларга ишонч билдиради. Уларда ОЧЛда жуда бой тажриба бор.

— Эртага сизни дуранг натижа қониқтирадими?
— Халқаро майдондаги ҳар бир ўйин мен учун биринчиси каби муҳим. Бу футбол ва бу ерда ҳамма нарса бўлиши мумкин. Биз ҳар ўйинда ғалаба учун ўйнаймиз. Дуранг натижани ёмон деб ўйламайман.

— Эртанги ўйиндаги мағлубият сиз учун фожеа бўладими?
— Бу футбол. Бу ўйин. Кимдир ютади, кимдир енгилади. Мағлубиятга учраган тақдиримизда кейинги ўйинларга тайёрланамиз. Умид қиламанки, биз яхши натижа кўрсатамиз.

— Сиз учун Эрон чемпионлигини қўлга киритиш муҳимми, ёки чемпионлар лигасда гуруҳдан чиқиш?
— Биз учун миллий чемпионатдаги ғалаба муҳим. Иккиламчи чемпионлар лигаси.