"Манчестер Юнайтед" академиясининг 1992 йилги машҳур битирувчилари: Пол Скоулз, Райан Гиггз, Никки Батт ва ака-ука Фил ва Гари Невиллар яқин вақтлар ичида "Сэлфорд Сити" клуби хўжайинларига айланишади.

"МЮ"нинг собиқ ўйинчилари аллақачон клубни сотиб олиш бўйича келишувга эришишган. Энди фақат Англия лигасидан керакли ҳужжатларни олиш талаб этилмоқда холос. Барчаси ёзда ниҳоясига етиши кутилмоқда.

Аввалроқ эса, клубнинг янги раҳбарлари стадионда янги трибуна ва янги база қуриш ниятида эканликлари, бунинг учун рухсат ҳам олишгани маълум бўлганди.

Қайд этиш керак, "Сэлфорд Сити" айни пайтда Англия саккизинчи дивизионида тўққизинчи ўринни эгаллаб турибди.

Ўз навбатида, юқорида номи тилга олинган футболчиларнинг "МЮ"ни сотиб олишга уринаётганлари ҳақидаги хабарлар рад этилган.