«Луис Суарес ёзда «Барселона» ёки «Реал»га ўтишини тан олди». Британиянинг биринчи рақамли нашри Daily Mail'да шундай сарлавҳали хабар тарқалди. Унда қуйидагилар ёзилган.
«Барселона» ҳамда «Реал»нинг менга қизиқиш билдирганидан хабарим бор. Буни табиий ҳол деб қабул қиламан. Барча жамоа хоҳлаган футболчисига қизиқиши мумкин. Айни вақтда менинг эътиборим жаҳон чемпионатига қаратилган. Менинг Испанияга кетишим ҳақидаги саволни чеклаб ўтсак. Мен нима хоҳлашимни ўзим биламан ва қандай қарорга келганимни жаҳон чемпионатидан кейин айтаман.
Мавсум биз учун жуда яхши ўтди. «Челси» билан ўйин барчасини ҳал қилар эди. Ўша ўйинда бизга омад келмади. Умуман олганда мавсум мен ва жамоа учун яхши ўтди. «Олтин бутса» учун Криштиану Роналду, Лионель Месси ҳамда Диего Косталар билан курашаётганимдан хурсандман»,- дейди ҳужумчи.
Кўриб турганингиздай, бу ерда мен айнан шу жамоага ўтаман деган гап йўқ. Лекин британиялик журналистлар олдинги ҳодисаларни инобатга олган ҳолда Луиснинг «Ливерпуль»дан кетишига ишонишмоқда. Хабарингиз бор, мавсум бошида Суарес унга нисбатан ҳаддан ташқари кучли босим бўлаётгани сабаб Англиядан нолиган эди. Инглизлар Суареснинг 2018 йилгача имзолаган шартномасини эса трансфер нархининг оширилиши деб баҳолашмоқда.
Эслатиб ўтамиз, Суарес АПЛнинг энг яхши футболчиси ва энг яхши тўпурари бўлган эди. «Олтин бутса» пойгасида ҳам унинг имконияти жуда юқори. Агар Криштиану Роналду охирги ўйинда майдонга тушмаса, соврин Луисга насиб қилади.
