Россияда июнь ойида бошлаб сайтлар учун юқори даражадаги .futbol домен номларини рўйхатдан ўтказиш бошланади. Бу ҳақда Webnames.ru компанияси хабар берди.

Доменнинг ёзилиши инглизча football сўзидан фарқ қилади. «Футбол – халқаро ўйин, шу сабабли ҳам, ташкилотчилар фикрича, домен номи ҳам турли мамлакатлар аҳолиси учун тушунарли бўлиши керак. Асос сифатида сўзнинг товуш оҳанги олинди», – дейилади Webnames.ru хабарида.

«Футбол» зонасидан ташқари, .trade савдо доменида, шунингдек, .dating (танишув), .events (тадбирлар), .webcam (вебкамера), .cards (карточкалар) ва бошқаларда сайтларни рўйхатдан ўтказиш бошланади.

Ушбу домен зоналарида номларни домен номларининг халқаро назоратчиси – ICANN томонидан тан олинган Россиянинг тўртта компанияси – Ru-center, Webnames.ru, Reg.ru ва 101domain рўйхатдан ўтказади.

ICANN’нинг домен ҳамжамиятини кенгайтиришга қаратилган New gTLDs дастури доирасида яқин икки йил ичида 1,7 мингдан ортиқ юқори даражадаги янги домен номлари ташкил этилади.

Ҳозирги вақтда 295 домен маъқулланган, яна 1445таси навбатда турибди. Тавсия этилган 569 домен номи баҳсли бўлиб, уларнинг жорий этилиши кечиктирилиши мумкин.

Дастур .moscow ва .london каби ўнлаб геодоменларни ишга туширишни ҳам кўзда тутади. Бундан ташқари, .holdings ва .health каби тармоқ ва ихтисослик доменлари ҳам пайдо бўлади.