Озарбойжон ва Ўзбекистон терма жамоалари ўртасидаги ўртоқлик учрашувида ҳисоб очилмади. Сафарда дуранг натижа ёмон эмасдек туюлиши мумкин, аммо ушбу ўйинда ғалаба қозонишимиз керак эди.

Озарбойжон терма жамоаси ҳеч бир жиҳати билан ажралиб турмади. "Спорт" канали орқали ўйинни шарҳлаб борган журналист бу жамоада Европага хос бўлган қандай жиҳатни "кўра олгани" биз учун қоронғу, аммо озарлар фақат ҳимояни инобатга олмаганда, ўйин ташкил қилиш, ҳужум ва комбинацияларда умуман ажралиб туришмади. Боз устига, мезбонлар иккинчи бўлимда очиқчасига дуранг учун ўйнашди.

Терма жамоамиз мезбонларнинг палапартишлигидан дастлабки 30 дақиқа давомида фойдаланиб олиши шарт эди. Аммо Сардор Рашидов, Фозил Мусаев ва Навруз Олимов имкониятлардан фойдалана олишмади. Биринчи бўлимнинг сўнгги 15 дақиқасида Берти Фогтс шогирдлари бир нечта хавфли вазиятларни яратишди. Ўйинни яхши ўтказган Элдорбек Суюнов ўз дарвоза дахлсизлигини сақлаб қолди.

Иккинчи бўлимда хавфли вазиятлар у қадар кўп бўлмаса-да, юзага келди. Рашидовнинг жаримадан йўллаган зарбасини Салахат Алиев қайтариб қолган бўлса, жуда кўп вазиятларда меҳмон ҳимоячилари хушёрлик билан ўйнаб, сўнгги паллада футболчиларимизга зарба йўллаш имкониятини беришмади.

Терма жамоамиз Озарбойжон билан 10-учрашувини ўтказди ва Бокуда дастлабки дуранг натижани қайд этди. Бунгача 3та ўйинда Ўзбекистон мағлубиятга учраганди.

Ўзбекистон терма жамоаси навбатдаги ўртоқлик учрашувларини 4 ва 8 сентябрь кунлари Иордания ва Янги Зеландия терма жамоаларига қарши Тошкентда ўтказади.

Халқаро ўртоқлик учрашуви
ОЗАРБОЙЖОН – ЎЗБЕКИСТОН - 0:0
Огоҳлантиришлар: Ислом Тўхтахўжаев (28), Егорь Кримец (43)
Озарбойжон: Салахат Агаев, Расим Рамалданов, Руслан Абишов, Уфук Будак (Нурий 46, Аллахвердиев 90+3), Моҳир Шукуров (с), Рахид Амиргулиев, Вагиф Жавадов (Озкар 46), Руфат Дадашов, Рауф Алиев (Жавид Гусейнов 73), Дмитрий Назаров, Тугрул Эрат (Афран Исмайлов 59).
Ўзбекистон: Элдорбек Суюнов, Егор Кримец (Бобур Йўлдошев 53), Ислом Тўхтахўжаев (С), Салим Мустафоев, Даврон Ҳошимов, Сардор Рашидов, Фозил Мусаев (Дилшод Жўраев 73), Жамшид Искандаров (Фаррух Сайфиев 67), Владимир Козак (Азим Аҳмедов 79), Навруз Олимов (Игорь Сергеев 53), Иван Нагаев (Шаҳзод Нурматов 45+2).
Бош ҳакам: Гиорги Вадачкория (Грузия).
20 август, Боку. «БакселлАрена».