"МЮ" ижрочи директори Эд Вудворд клубга янги тайинланган бош мураббий Луи ван Гал ва Аdidas билан тузилган шартнома ҳақида фикр билдирди.
"Таркибимизга стабилликни қайтарганимизни ҳис қилиб турибмиз. Учта футболчи кетса, учта футболчи олиб келяпмиз, буни кўпроқ ёзги трансферлар чоғида бажаряпмиз.
Мураббийимиз кимнидир истаса, уни олиб келиб бера олишимизни намойиш қилдик. Агар январда имкониятимиз бўлса, худди Матани олиб келганимиз каби яна футболчи олишимиз мумкин.
Биз ёзги трансферларни ажойиб ўтказдик, Ди Мария, Блинд, Шоу, Эррера, Рох ва Фалькаони қўшиб олдик.
Тижорий томондан ҳам кучайиб боряпмиз. Аdidas билан тузган рекорд келишув келаси ўн йилликда рақобатбардош клуб бўлишимизни таъминлайди.
Аdidas билан тузилган 750 миллион фунтлик шартнома нафақат футболда, балки барча спорт мусобақалари учун рекорд саналади. Бу тўрт йиллик тинимсиз меҳнат натижасидир. Бизга дунёнинг 20дан ортиқ компанияларидан таклифлар тушди", - дея Вудворднинг сўзларини келтиради Sky Sports.
