Бугун Европа футболи ишқибозларининг нигоҳи Италиядаги "Сан-Сиро" стадионига қаратилади. "Милан" ва "Интер" жамоалари ўртасидаги дербига қизиқиш ҳамиша юқори бўлиб келган.

Ушбу жамоаларнинг расмий ўйинларидаги ўзаро натижаларига эътибор қаратадиган бўлсак, кичик устунлик "Интер" томонида эканини кўрамиз. "Нерадзурри" 76та ўйинда ғалаба қозонган бўлса, "россонери" ҳисобида 72та ғалаба бор. Тўплар фарқи — 290-286, "Интер" фойдасига.

Бугунги ўйин Италия А серияси доирасидаги 165-Милан дербиси бўлади. Бу ерда «Интер» 62та, «Милан» – 52та ғалабага эришган.

Ушбу мавсумнинг 11 туридан кейин «Милан» ва «Интер» атиги 4тадан ғалабани қўлга киритишди. Жамоалар сўнгги марта 1994/95-йилги мавсум стартида шундай кам ғалабани қайд этишганди. Ўшанда дастлабки 11 турдан кейин "Милан" ҳисобида 4та, "Интер"да 3та ғалаба ёзилганди.

Италия чемпионатининг ушбу мавсумида "Милан" футболчилари томонидан дарвоза томон берилаётган зарбалар рақибларга кўпроқ хавф туғдирмоқда. Яъни зарбаларнинг 42,6 фоизи голга айланмоқда. «Интер» эса бу борада еттинчи натижага эга (31,5%).

Кейсуке Хонда ушбу мавсумда 6та гол уриб, "Милан"нинг энг яхши тўпурари бўлиб турибди. Япониялик футболчи сўнгги 4та ўйинда гол ура олмади.

Эслатиб ўтамиз, "Милан" ва "Интер" ўртасидаги ўйин бугун оқшомда, соат 00:45да бошланади. Сайтимиз мазкур ўйинни матнли онлайн трансляция шаклида эътиборингизга ҳавола қилади.