Ўзбекистон миллий терма жамоаси БААда ўтказилаётган ўқув-машғулот йиғини режасига кўра 10 декабрда Кувайт терма жамоаси билан ўртоқлик ўйини ўтказиши лозим эди. Аммо бу ўйин ўтказилмайдиган бўлди.
Хабар қилинишича, Кувайт томони ушбу учрашувдан бош тортган. Шундан сўнг ташкилотчилар шошилинч равишда БААнинг "Ал Шааб" клуби билан ўртоқлик ўйини борасида келишувга эришганлар. Эслатиб ўтамиз, ўз вақтида бу клуб шарафини ўзбекистонлик легионерлар Тимур Кападзе ва Ойбек Қиличевлар ҳимоя қилишган эди.
Шу ўринда таъкидлаб ўтиш лозим, Ўзбекистон миллий терма жамоаси йиғин доирасида Янги Зеландиянинг "Окленд" клубига қарши назорат учрашуви ўтказган ва 0:0 ҳисобида дуранг натижа қайд этганди.
