Америкалик боксчи Эллиот Сеймур Микки Рурк билан ўтказган жангини унинг вакиллари томонидан берилган 15 минг доллар эвазига ютқазиб берганлигини тан олди. Шу билан бирга Сеймурнинг сўзларича, Руркнинг агенти унга Рурк ўз ғалабасини ҳаққоний деб ҳисоблаши учун бу келишув ҳақида ҳеч кимга айтмаслигига келишиб олган.

Аввалроқ Руркнинг рақиби жанг ҳаққоний ўтгани ва у жангга бор-йўғи бир ой тайёргарлик кўргани сабабли мағлубиятга учраганини таъкидлаб ўтган эди.

Маълумот учун, 30 норябрь куни Голливуд юлдузи Микки Рурк “Лужники” спорт саройида бўлиб ўтган жангда калифорниялик дайди боксчи Сеймурни мағлуб этган. Жанг худди атайлаб тайёрланган томошага ўхшаб ўтган, ғарб ОАВлари эса 29 ёшли боксчини 62 ёшли Руркка атайлаб ютқазиб берганлигини тахмин қилишганди. Ушбу жанг ташкилотчиси, “Мир бокса” промоутерлик компаниясининг раҳбари Андрей Рябинский “LifeNews” каналига берган интервьюсида жангни келишилган деб аташга асослар йўқлигини ҳамда Руркнинг промоутери эмаслигини, Руркнинг ўзи унга қарши Эллиот Сеймурни рингга чиқишини сўраганлигини таъкидлаб ўтган.

Сеймур ўтказган 10 та жангдан 9 тасини ютқазган бўлиб, охирги пайт ишлари юришмаётгани сабабли кўчада яшашига тўғри келган. Бундан ташқари, боксчининг қариндошлари Эллиотнинг руҳан носоғломлигини ва шу туфайли эксплуатацияга учраган бўлиши мумкинлигини айтишмоқда.