Эрон футболининг номдор ўйинчиси 31 ёшли Андраник Теймурян (Андо) 27 декабрь куни Табрезнинг “Тракторсози” клуби билан ярим йиллик шартнома имзолади.

Тўлиқ исм-шарифи: Андраник Теймурян – Самарани
Фуқоралиги: Эрон
Туғилган жойи: Теҳрон шаҳри, Эрон
Туғилган санаси: 31 март 1983 йил (31 ёш)
Амплуаси: ярим ҳимоячи
Бўйи: 180см
Вазни: 73кг

Андраник Теймурян бундан аввал Теҳроннинг “Истиқлол” клубида фаолият юритаётган эди. У 2010/11 йилги мавсумда ҳам “Тракторсози” клубида ўйнаган.

Андраник Теймурян ўтмишда Англия Пример лигасиниг “Болтон”, “Фулхэм” клубларида ҳам фаолият юритган. У Эрон миллий терма жамоаси сафида 2006 йили жаҳон чемпионатида иштирок этган. У 2011 йилдан терма жамоага сардорлик ҳам қилади.

Ўз ўрнида эслатиб қўймоқчимизки, ушбу футболчи келаси йил 25 февраль куни Қарши шаҳрида бўладиган 1-турдаги “Насаф” – “Тракторсози” учрашувида иштирок этса, иккинчи марта Қарши шаҳрига ташриф буюрган ҳисобланади. У 2012 йили ОЧЛ-2012 гуруҳ босқичидаги “Насаф” – “Истиқлол” учрашувида иштирок этиш учун Қарши шаҳрига келган, аммо бетоблиги сабаб ўйинни трибунада туриб томоша қилган эди.