Қатар пойтахти Доха шаҳрида оғир атлетика бўйича ўсмир (17 ёш) ва ёшлар (20 ёш) ўртасидаги Осиё чемпионати якунланди. Қитъа биринчилигида Ўзбекистон ўсмир ҳамда ёшлар терма жамоалари ҳам юртимиз спорт шарафини ҳимоя қилди.

Ўсмирлар ўртасидаги баҳсларда Фарҳод Собиров (-85 кг) 2 та бронза медалига сазовор бўлди. Азимжон Ғаниев (-105 кг) эса бир йўла 3 та кумуш медални қўлга киритди. Ёшлар ўртасида ўтказилган мусобақада Суннатилло Шокиржонов (-85 кг) битта бронза медали билан тақдирланди. Шунингдек, Шаҳзод Худойберганов, Даврон Кенжаев ва Жўрабек Зоировлар ҳам биттадан бронза медалига эга бўлишди. Кеча тунда терма жамоамиз делегацияси Тошкентга қайтиб келди.

Бугун Дохада Осиё оғир атлетика федерациясининг Конгресси ўз ишини давом эттиради. Кеча бошланган мазкур Конгрессда Осиё ҳамда Ўзбекистон оғир атлетика федерациялари вице-президенти Шаҳрулло Маҳмудов ва Осиё оғир атлетика федерацияси илмий ва техник комиссияси аъзоси, Ўзбекистон Миллий Олимпия қўмитаси бошқарма бошлиғи Рашид Маткаримов иштирок этишяпти.