Жанубий Корея ОАВларида "Шимолий кореялик спортчилар йирик халқаро мусобақаларда муваффақиятсиз иштирок этса, Ватанига қайтгач, "Аоджи" кўмир конига мажбурий меҳнатга сургун қилинади", деган норасмий гаплар юради. 2010 йилги ЖЧдаги муваффақиятсизликдан кейин бошлари эгик ҳолда майдонни тарк этган шимоллик корейсларнинг ҳолатини ҳам мажбурий меҳнатга юборилишдан хафа бўлганликка йўйишганди.
Австралияда Шимолий Корея номидан ОАВга кўриниш бераётган Шимолий Корея футбол ассоцияцияси халқаро алоқалар бўлими бошлиғи Ри Канг Хонг бугун жанубий кореялик журналист Чонг Же Хунга бу каби миш-мишларни шарҳлаб берди.
"Бу гаплар ҳақиқатдан узоқ (кулади). Бизда бундай мажбурлаш йўқ. Мағлубиятлар таҳлил қилинади. Сизлар айтгандек, футболчилар кўмир конига сургун қилинса, бу ишни футбол ассоцияцияси раҳбариятидагилардан бошлашган бўларди. Бундай вазиятларда хўлу қуруқ баравар ёнади. Лекин мажбурий меҳнат деган нарса йўқ. Инкор этмайман: Шимолий Кореяда Меҳнат партияси аъзоларигина ноқонуний ҳаракат қилса, оддий халқнинг ҳаёт тарзини бошидан ўтказиб кўриши учун мажбурий меҳнатга юборилади. Биз яқинлашаётган ЖЧга чиқиш мақсадимиз бор. Бунинг учун мамлакатимиз ва футболимиз раҳбарияти бошқа жамоаларга қараганда бир қадам илгари югуришимиз кераклигини уқтирган", деди Ри Канг Хонг.
"Аоджи" кўмир кони 1936 йили очилган бўлиб, Шимолий Кореянинг Кёнгхинг минтақасида жойлашган. Жанубий Корея терма жамоасининг собиқ бош мураббийи Хо Жунг Му футболчилик давридаги бир ҳолатни эслаб ўтган:
"1978 йили Осиё Ўйинлари футбол мусобақаси финалида икки Корея дербиси бўлганди. Ўшанда ўйин олдидан агар шимолий кореялик футболчилар мағлубиятга учрашса, “Аоджи” кўмир конига сургун қилинаркан, деган гаплар тарқалганди".
Отабек Йўлдошев
Жанубий Корея, Сеул
