"Челси" бош мураббийи Жозе Моуриньо "Манчестер Сити"га қарши ўйиндан олдин ва ўйиндан кейинги матбуот анжуманларига ташриф буюрмади. Англия футбол ассоциацияси бу ҳолати юзасидан суриштирув ишларини бошлади.
Аслида матбуот анжуманларига ташриф буюриш, телетрансляция шартномалари бўйича, мураббийнинг мажбурияти ҳисобланади. The Guardian нашрининг ёзишича, португалиялик мутахассисга жазо қўлланилади.
Англия Премьер-лигасининг 19-тури доирасида "Саутгемптон"га қарши бўлиб ўтган ўйиндан кейин Моуриньо ҳакамлар шаънига танқидлар ёғдирганди. Унинг фикрича, англиялик ҳакамлар ўзаро тил бириктириб, "Челси"га қарши ишлаш бўйича келишиб олишган. Ушбу фикри учун Жозе Англия футбол ассоциацияси томонидан 33,5 минг фунт миқдорида жаримага тортилганди.