Англия жамоалари 2014 йилнинг ёзидаги ва 2015 йилнинг қишидаги трансферлар ойнаси вақтида жами 835 млн фунт сарфлаб (1,435 млрд доллар), рекорд ўрнатишди. Бу ҳақда “Делойт” аудитор компанияси маълумотларига асосланиб хабар берилган.

2 февраль кунида трансфер ойнаси ёпилганидан кейин, АПЛ жамоалари ўтган мавсумдагидан 75 млн фунт кўпроқ сарфлагани маълум бўлди.

Лекин, бу пулларнинг асосий қисми ёзги трансферлар ҳиссасига тўғри келади, қишки трансферларда эса 130 млн фунт ишлатилган. Қишки трансферлар вақтидаги рекорд 2011 йилда қайд этилган, ўша йилда инглиз жамоалари футболчиларни сотиб олиш учун 225 млн фунт сарфлаган эди.

Йиллик натижалар бўйича рекорд ўрнатилишидаги асосий ишни “Арсенал”, “Манчестер Сити” ва “Челси” жамоалари бажаришган.

“Делойт” аудитор компаниясининг маълум қилишича, жамоаларнинг бу борадаги харажатларни ошириши АПЛ жамоаларининг ўйинлар трансляцияларидан тушадиган фойдаси 2012 йилдан бошлаб 70 фоизга ўсгани сабаб бўлган.

Маълумот учун, Англия Премьер Лигасидаги 20 жамоа дунёнинг энг бой 49 жамоаси сафига киради.