Ниҳоят, бугун Жанубий Корея футбол ассоцияцияси 27 март куни Ўзбекистон билан ўртоқлик ўйини ўтказилишини расман эълон қилди.
Бу ўйин асабий ва жанговор руҳда, расмий турнирдагидек даражада ўтиши тахмин қилинмоқда. Таиландда ўтган Қирол Кубоги можароларидан кейин корейс футбол жамоатчилигида Ўзбекистон футболига нисбатан ўзига хос салбий тасаввур пайдо бўлиб улгурди. Буни Жанубий Корея футбол ассоцияциясининг ушбу ўртоқлик ўйинини тасдиқлаганлиги ҳақидаги хабарлар остида қолдирилаётган юзлаб мулоҳазалардан ҳам англаш мумкин.
Ўзбекистон билан ўртоқлик ўйини ўтказиладиган стадион ҳали номаълум бўлса-да, бу катта эҳтимол билан Сеулдаги "Seoul World Cup Stadium" бўлиши мумкин. Айрим корейс ОАВлари хабарларига кўра, Ўзбекистон билан ўйин Жанубий Корея терма жамоаси ҳимоячиси Ча Ду Рининг [айрлашув ўйини бўлиши кутилмоқда. Ча Ду Рининг "Сеул" ФК клубида тўп суришини инобатга олсак, ушбу клубнинг уй аренаси ҳисобланган "Seoul World Cup Stadium"да ташкил этилиши мумкин.
Жанубий Корея футбол ассоцияцияси матбуот хизмати: "Ча Ду Ри терма жамоадан муносиб кузатилишга арзийдиган футболчи. У терма жамоамиз сафида 75 ўйин ўтказган. Ча Ду Ри билан хайрлашув ўйини Ўзбекистон ёки Янги Зеландияга қарши ўйин бўлиши мумкин. Бу ҳақда бош мураббий Ули Штилике ва футболчи билан маслаҳатлашиб олишимиз лозим", дея маълум қилди.
Сўнгги йилларда Жанубий Кореяда терма жамоа сафида кўп ўйин ўтказган футболчилар учун хайрлашув учрашувлари ташкил этиш урфга кирмоқда. Хусусан, 2013 йил ноябрь ойида корейсларнинг чап қанот ҳимоячиси Ли Ёнг Пё билан хайрлашув ўйини сифатида "Seoul World Cup Stadium"да Швейцария билан ўртоқлик ўйини ўтказилган эди.
Отабек Йўлдошев
Жанубий Корея, Сеул
