AQSH Adliya vaziri va bosh prokurori Loretta Linch yangi hukumat a’zolari FIFA ustidan korrupsiya mojarosi bo‘yicha ochilgan jinoiy ishni ko‘rib chiqishda davom etishini ma’lum qildi.
AP xabariga ko‘ra, 20 yanvar kuni yangi prezident Donald Trampning inaugurasiya marosimidan so‘ng, Linch o‘z lavozimini tark etadi. Uning o‘rnini senator Jeff Seshns egallaydi.
Linch xabariga ko‘ra, jinoiy ish yuzasidan dastlabki sud mahkamasi oktyabr oyiga mo‘ljallangan, tergov esa hamon davom etmoqda. Mulozimning so‘zlariga ko‘ra, FIFA tashkilotidagi korrupsiya bilan bog‘liq bu ishning hajmi juda katta bo‘lib, u iloji boricha tezroq hal qilinishi lozim.
Eslatib o‘tamiz, 2015 yil 27 may kuni Syurixda FIFA tashkilotining bir qator mulozimlari hibsga olingan edi. AQSH Adliya vazirligi xabariga ko‘ra, 24 yil ichida 14 mulozim jami 150 mln dollar miqdorida pora olgan.
