Turkiyada yangi mavsum tayyorgarliklarini olib borgan “Nasaf” yurtimizga qaytib kelgan edi.

Shundan so‘ng murabbiylar futbolchilarga qisqa muddatli tanaffus berishdi. Bugundan, ya’ni 25 yanvardan boshlab, jamoa Qarshi shahridagi o‘z qarorgohida yig‘ildi va mashg‘ulotlarga kirishdi.

Qarshi shahridagi tayyorgarlik mashg‘ulotlari 28 yanvargacha davom etadi va shu kuni jamoa Toshkent shahriga jo‘nab ketadi. Mashg‘ulotlar Toshkent shahrida ham davom ettiriladi.

“Nasaf” tarkibidagi o‘zgarishlarga to‘xtaladigan bo‘lsak. Jamoani rasman Fozil Musayev, Shuhrat Muhammadiyev, Ildar Mamatkazin va Azamat Allaniyozov tark etgan. Muqaddam “Bunyodkor” jamoasida to‘p tepgan Akmal Shorahmedov endi jamoa sharafini himoya qiladi. Avval yoshlar hamda “Nasaf-2” jamoamiz saflarida faoliyat yuritgan bir qator futbolchilar endi asosiy tarkib o‘yinchilariga aylanishdi. Tarkibda boshqa o‘zgarishlar yo‘q.

“Nasaf” bu yilgi  Osiyo chempionlar ligasidagi ishtirokini o‘tish bosqichidan boshlaydi. 31 yanvar seshanba kuni Toshkent shahridagi “Bunyodkor” stadionida bo‘lib o‘tadigan dastlabki bosqich uchrashuvida jamoa Bahraynning “Al-Hidd” jamoasiga qarshi maydonga tushadi. Uchrashuv soat 16:00da boshlanadi.

Bahraynning “Al-Hidd” klubi ham yurtimizga 28 yanvar kuni kechki payt tashrif buyuradi. Klub rasmiy delegasiyasi va futbolchilari Toshkent shahridagi “Miran international” mehmonxonasiga joylashishadi.