«Barselona» bosh murabbiyi Luis Enrike yarim himoyachi Andresa Inyestani adabiy qahramon Garri Potterga o‘xshatdi.

«Denis Suares Inyestaning o‘rnini bosa oladimi? Nima uchun bosa olmasligi kerak? O‘yinchilar o‘sib borishlari kerak. Shuning uchun Suares ham rivojlanishi lozim. Lekin Inyesta — bu Garri Potter. U maydonda sehr yaratadi, bunaqasini topish qiyin. Denis esa to‘g‘ri yo‘nalishda harakatlanmoqda. Umid qilaman, u Andresning o‘rnini bosa oladi.

Gollar uning ruhiy holatini ko‘taradi. U kerak paytda jarima maydonchasiga keldi, ammo u yanada samaraliroq harakat qilishi lozim. Denis — «Barsa B»dan ketib, ortga qaytgan kam sonli futbolchilardan biri. Shuningdek, uning to‘psiz o‘ynash xislatini ham ta’kidlash kerak. Buni hamma ham payqayvermaydi. O‘yinda siz to‘p bilan bir-bir yarim daqiqa harakat qilishingiz mumkin. Agar siz to‘psiz o‘ynashni bilmasangiz, yuqori darajada sizda imkoniyat bo‘lmaydi. Denis bu tushunib turibdi, jamoadoshlari uni yaxshi ko‘rishadi», — deydi Luis Enrike.

Ispaniya kubogining chorak final bosqichi doirasida «Real Sosyedad»ga qarshi o‘yinda «Barselona» 5:2 hisobida g‘alaba qozondi, Denis Suares esa "dubl"ga erishdi.