Madridning «Real» klubi prezidenti Florentino Peres o‘z lavozimini tark etish haqida o‘ylamoqda, deya xabar tarqatdi Mundo Deportivo.

Manbaga ko‘ra, "Qirollik klubi" rahbari o‘z ishini davom ettirishi mumkin bo‘lgan, uning qilgan mehnatlarini hurmat qiladigan nomzod qidirmoqda. Shuningdek, bo‘lajak rahbar klub qoidalariga rioya qilishi, prezident lavozimi uchun kerakli xususiyatlarga ega bo‘lishi va «Santyago Bernabeu» stadionining ta’mirlash ishlarini davom ettirish lozim.

Florentino Peres ilk marta 2000 yilda "qaymoqranglilar" prezidenti lavozimiga saylangandi. U jamoa boshqaruviga kelganidan keyin "Real" «Pavon va Zidanlar siyosati» g‘oyasi bilan ishladi. Biroq u faqat "galaktikos" yaratish fikrini amalga oshira oldi. Klub tarbiyalanuvchilari esa jamoaning asosiy tarkibidan joy topib ketishi qiyin bo‘ldi. U 2006 yilda o‘z lavozimidan iste’foga chiqqandi, biroq oradan 3,5 yil o‘tib yana bu lavozimga qaytdi.

Peres boshqaruvi paytida «Real», Ispaniya chempionatida 3 marta (2000/01, 2002/03, 2011/2012), Chempionlar ligasida 3 marta (2001/02, 2013-14, 2015-16) va klublar o‘rtasidagi jahon chempionatida 2 marta (2014, 2016) g‘oliblikni qo‘lga kiritdi.