Angliya futbol assosiasiyasi «Bornmut» himoyachisi Tayron Mingz va «Manchester Yunayted» hujumchisi Zlatan Ibrohimovichga qo‘pol o‘ynaganlik haqida rasmiy ayblov e’lon qildi.

O‘zaro o‘yinning 44-daqiqasida, dastlab Mingz yerda yotgan Ibrohimovichning boshini bosgan, keyinchalik esa Zlatan uning boshiga tirsagi bilan urgandi. Bosh hakam Kevin Frend esa buni payqamagan va futbolchilarni jazolamagandi.

Ibrohimovich katta ehtimol bilan uch o‘yinga, Mingz esa uzoqroq muddatga diskvalifikasiya qilinishi mumkin. Eslatib o‘tamiz, o‘yindan so‘ng har ikkalasi ham atayin bu ishni qilmaganini aytgan.

Endi har ikkala futbolchi 7 mart kuni bu boradagi tushuntirishlarini taqdim qilishlari shart.