Lina Cheryazova - 1968 yilning 1 noyabrida Toshkentda tug‘ilgan. Fristayl bo‘yicha jahon chempioni, ikki karra jahon kubogi g‘olibi, Lillexammer olimpiadasi chempioni. "O‘zbekiston Respublikasida xizmat ko‘rsatgan sportchi", "O‘zbekiston iftixori" faxriy unvonlari bilan takdirlangan. Lina 7 yoshidan gimnastika, 12 yoshidan boshlab 18 yoshigacha akrobatika bilan shug‘ullangan. Akrobatika bo‘yicha O‘zbekiston chempioni.
Lina o‘n sakkiz yoshga to‘lgach, sportning qishki turi - chang‘i uchish - fristaylda o‘z imkoniyatlarini yuzaga chikarishga bel bog‘ladi U qiya tramplindan chang‘ida katta tezlikda tushish, so‘ng qayrilmadan parvoz etib, 15-20 metr balandlikda aylanish, havoda har xil mashqlarni bajarish, qorga ohista qo‘nish bexatar emasligini tushungani holda shu mashaqqatli yo‘lni tanladi.
Oradan sakkiz yil o‘tgach, quyoshli O‘zbekiston vakili bo‘lgan bu qiz 26 yoshida dunyoni lol qoldirib, qishki olimpiya o‘yinlari chempioni bo‘lishini hech kim xayoliga keltirmagan edi, albatta.
1990 yili Yevropa chempionatida bronza medalini qo‘lga kiritishi uning o‘ziga bo‘lgan ishonchini yanada mustahkamladi. 1993 yili u jahon chempioni hamda jahon kubogi sohibi bo‘ldi.
Lina Cheryazova 1994 yili jarohatlangan bo‘lishiga qaramay Lillexammer Olimpiadasida qatnashdi va havoda uch marta aylanadigan murakkab dasturni bajarib, mislsiz g‘alabaga erishdi! Uning bu muvaffaqiyati mustaqil O‘zbekiston sportchilarining olimpiadada qo‘lga kiritgan birinchi oltin medali sifatida tariximizdan munosib o‘rin oldi.
Lina Cheryazova 1996 yili Xarbindagi Osiyo o‘yinlarida, 1998 yili Nagano olimpiadasida ishtirok etdi. Quyoshli yurt qizining jumlai jahonda qor malikasi deb tan olinishi, og‘ir ruhiy va jismoniy jarohatlarni pisand etmay, shunday nufuzli musobaqalarda qatnashishi va g‘oliblikka da’vogarlik qilishining o‘zi tengsiz mo‘’jiza, inson matonati haqidagi dostondir.
