Ispaniya sport tribunali (TAD) bugun shoshilinch ravishda kengash o‘tkazishni rejalashtirmoqda.
U Toshkent vaqti bilan soat 16:00da boshlanadi, deb xabar bermoqda AS.
Gap shundaki, «Barselona» klubi Ispaniya chempionatining 33-turi doirasida "Real"ga qarshi o‘yinda Neymarning xizmatidan foydalanish imkoniyatini saqlab qolish maqsadida, juma kuni kechki payt Ispaniya sport tribunaliga (TAD) shikoyat kiritgan edi.
TAD kecha kunduzi o‘zining navbatdagi yig‘ilishini o‘tkazgani bois, bu yig‘ilishda Neymar ishi ko‘rib chiqilmadi. Odatda TAD turli ishlarni ko‘rib chiqish uchun haftada 1 marta yig‘iladi. TAD Neymarning ishini ko‘rib chiqqunga qadar "Barselona" futbolchining diskvalifikasiyasi to‘xtatib turilishiga umid qilgandi.
Agar sport tribunali 22 aprel, shanba kuni favqulodda yig‘ilish o‘tkazmasa, Neymarning diskvalifikasiyasi vaqtinchalik to‘xtatiladi hamda futbolchi yakshanba kuni bo‘ladigan o‘yinda ishtirok etishi mumkin edi. Ammo tashkilot a’zolari shu bugunoq kengash o‘tkazmoqchi, natijada Neymarning diskvalifikasiyasi o‘z kuchida qoldirilishi mumkin.
Eslatib o‘tamiz, Neymar 3ta o‘yindan diskvalifikasiya tufayli «Real Sosyedad»ga qarshi o‘yinni (2:3) o‘tkazib yuborgandi. Braziliyalik futbolchi "Malaga"ga qarshi o‘yinda (0:2) maydondan chetlatilganidan keyin, hakamga qarata istehzo bilan qarsak chalgani uchun shu tariqa jazolandi.
