Ispaniya chempionatining 33-turidan o‘rin olgan «Real» - «Barselona» (2:3) o‘yinida Messi so‘nggi daqiqada gol urib, jamoasiga g‘alaba keltirgandi.

Keyin «Real»ning fanatlar tribunasida o‘tirgan bir qancha muxlislar uning golini xursandchilik bilan nishonlashdi. Bu esa madridlik muxlislarning e’tiroziga sabab bo‘ldi.

Shundan so‘ng, «Real» bu mojaroni o‘rganib chiqib, aybdorlarni topishga muvaffaq bo‘ldi.

Aniqlanishicha, o‘yindan oldin «Real»ning 1500ga yaqin muxlisi o‘z abonementlarini «Barselona» fanatlariga sotgan. Natijada mehmon jamoa muxlislarining ancha-munchasi «Real» futbolkalarini kiyib, mahalliy muxlislar o‘tiradigan tribunaga kirgan. Messi gol urganida esa ular shod-xurramlik bilan nishonlashgan.

Ayni paytda, «Real» bu qoidabuzarlikka yo‘l qo‘ygan 635 nafar muxlisning shaxsini aniqladi. Barcha ma’lumotlar klubning tartib-intizom qo‘mitasiga jo‘natildi. Endi ular abonementlardan ayrilishi va fanatlar uyushmasi safidan chiqarilishi mumkin.