Ispaniya sudi Braziliya terma jamoasi va «Barselona» hujumchisi Neymar ustidan yangi jinoiy ish ochdi.
Meridiano xabariga ko‘ra, futbolchi o‘z transferi bilan bog‘liq firibgarlikda ayblanmoqda. Endi Neymar, uning otasi va yangi ochilgan dalillarga ko‘ra, «Barselona» prezidenti Xosep Mariya Bartomeu bilan sobiq prezident Sandro Rossel ham sud oldida javob beradigan bo‘ldi.
Eslatib o‘tamiz, futbolchining 40% transfer huquqiga egalik qilgan DIS investisiya kompaniyasi rahbariyati uni jazolanishini talab qilmoqda. Gap shundaki, 2013 yilda Neymarning «Santos»dan «Barselona»ga transfer qilinishida, kompaniya o‘ziga tegishli ulushni ololmagan. Dastlab, Neymarning transfer narxi 57 mln yevro deb e’lon qilingan, keyinroq esa, bu narx keskin kamaytirib ko‘rsatilgani aniqlangan. Ayni paytda, «Barselona», «Santos» va Neymarning otasiga tegishli kompaniya firibgarlikda ayblanmoqda.
Bu ishni olib borayotgan Ispaniya prokuraturasi Neymarni 10 mln yevro jarimaga tortib, 2 yilgacha qamalishini talab qilgan. Ammo, ish bilan tanish manbalardan birining ma’lumotiga ko‘ra, «Barselona» va «Santos» 15 mln yevro jarimaga tortilib, Neymar shartli ravishda jazolanishi mumkin.
