«Barselona» hujumchisi Lionel Messi o‘z mablag‘i hisobidan Suriyaning urushda vayron bo‘lgan shaharlaridan birida bolalar uchun maktab qurdirdi.

Bu haqda u o‘zining feysbuk sahifasida xabar qildi.

«Leo Messi fondi YUNISEFga Suriyada 20ta sinf xonasini barpo qilishga yordam berdi va shu orqali 1600 bolakayning ta’lim olish sharoitini yaxshiladi» – deb yozdi Messi.

Messining yordami bilan sinf xonalari barcha zarur jihozlar bilan ta’minlangan, ularga o‘quv muhitini yaxshilash maqsadida quyosh batareyalari o‘rnatilgan. Bunday maktablarga ta’lim oladigan o‘quvchilarning 60 foizdan ortig‘i urush natijasida o‘z uyini tark etishga majbur bo‘lgan oilalarda yashaydi. Olti yildan buyon davom etayotgan Suriyadagi urush sabab, mamlakatdagi shifoxonalar, maktablar va uylar vayron qilingan.

Avvalroq, Messi yana bir xayrli ishga qo‘l urib, Misrda gepatit S xastaligiga qarshi kurashish tadbirida ishtirok etgan edi.