O‘zbekiston terma jamoasining sobiq himoyachisi Ulug‘bek Ro‘zimov olamdan o‘tdi.

1994 yilgi Osiyo o‘yinlarida g‘olib bo‘lgan Ulug‘bek Ro‘zimov 49 yoshida jigar sirrozi kasalidan vafot etdi. Bu haqda sport jurnalisti Kamoliddin Alimov feysbukdagi sahifasida xabar qoldirgan.

Asli xorazmlik bo‘lgan, futbolchilik faoliyatida «Navbahor», «Paxtakor», «Xorazm», «Metallurg» jamoalarida o‘ynagan Ulug‘bek Ikramovich Ro‘zimov oxirgi yillarda «Paxtakor» akademiyasining 12 yoshgacha bo‘lgan futbolchilari jamoasida murabbiy bo‘lib ishlayotgandi.

U O‘zbekiston terma jamoasi safida 23 o‘yinda maydonga tushib, 2ta gol urgan. 1994 yili Osiyo o‘yinlarida g‘olib chiqqan. Davlatimiz tomonidan «Shuhrat» medali bilan taqdirlangan.

Ulug‘bek Ro‘zimovning oila-a’zolariga, yaqinlariga hamdardlik bildiramiz.