O‘tgan yil yozda Pol Pogba futbol tarixidagi eng qimmat futbolchiga aylandi. Fransiyalik futbolchi “Yuventus”dan 105 million yevro evaziga “Manchester Yunayted”ga ko‘chib o‘tdi. Ko‘rinib turibdiki, bunday katta narx FIFAning e’tiborini jalb qilmasdan qolmagan.

Mediapart xabariga ko‘ra, FIFA o‘tgan yilning 16 sentyabrida Pol Pogbaning transferi borasida surishtiruv ishlarini boshlagan. Fransiyalik yarimhimoyachining transfer muzokaralarini olib borgan futbol agenti Mino Rayola ham FIFAning e’tiboridan chetda qolmagan. Football Leaks hujjatlariga tayangan holda, Mediapart quyidagilarni ma’lum qildi: italiyalik futbol agenti ushbu transferdan komissiya tariqasida 49 million yevro ishlab olgan. “Manchester Yunayted” esa Pol Pogba transferi uchun umumiy qiymatda 127 million yevro to‘lagan.

Bundan tashqari, shartnoma shartlarini ham ma’lum qilindi. Unga ko‘ra, Pogbaning yillik maoshi 10,2 million yevroni tashkil etadi. Bu raqam sentyabr oyidan 13,8 million yevrogacha ko‘tariladi. Klubning Chempionlar Ligasidagi har bir ishtiroki uchun futbolchi bonus tariqasida 2,2 million yevro oladi. Agarda Pogba “Oltin to‘p”ni qo‘lga kiritadigan bo‘lsa, yana 1,16 million yevro oladi. Bundan tashqari, “Manchester Yunayted” futbolchining timsolidan reklamalarda foydalangani uchun 3 million to‘lashga majbur. Klub Chempionlar Ligasida o‘ynaydigan mavsumlarda esa bu raqam 3,7 million yevrogacha ko‘tariladi.