Shu kunlarda Janubiy Koreyaning Muju shahrida taekvondo WTF bo‘yicha jahon chempionati bo‘lib o‘tmoqda.

Ushbu nufuzli musobaqada O‘zbekiston terma jamoasi 11 nafar sportchi bilan ishtirok etyapti. Ta’kidlash lozimki, terma jamoamiz bosh murabbiyi Akmal Irgashev tarkibga bugungi kundagi eng kuchli sportchilarni kiritdi. Ular orasida jahon chempioni Dmitriy Shokin, jahon chempionati sovrindori Nikita Rafalovich kabi dayan ustalari bor.

Har ikki yilda bir marta tashkil etiladigan jahon chempionatining bundan avvalgisi 2015 yilning 12-18 may kunlari Rossiyaning Chelyabinsk shahrida o‘tkazilgandi. O‘shanda Dmitriy Shokin +87 kg. vazn toifasida barcha raqiblarini mag‘lub etib, jahon chempionligini tantana qilgan bo‘lsa, -74 kg. va -87 kg. vazn toifalarida mos ravishda Nikita Rafalovich va Jasur Boyqo‘ziyevlar jahon chempionatining kumush medallariga sazovor bo‘lishgandi.

Nikita Rafalovich bu safar ham Jahon chempionati kumush medaligi sazovor bo‘ldi. U Ozarbayjon, Dominikana, Argentina, Meksika va Qozog‘iston vakillarini taslim etib, finalga qadar yetib borgandi. Ammo finalda rossiyalik tajribali raqibi Maksim Xamrasovga 3:6 hisobida imkoniyatni boy berib qo‘ydi.

Janubiy Koreyada taekvondo bo‘yicha Jahon chempionati davom etmoqda. Natijalarni saytimiz orqali kuzatib boring.